පරුමක පවිට පුත පරුමක ශිවෙන කරිතෙ මනපදශනෙ ශගශ
(ප‍්‍රමුඛ පවිටගේ/පවිත‍්‍රගේ පුත් ප‍්‍රමුඛ සිවයන් විසින් කරවන ලද මනාපදස්සනය සංඝයාටය)

ශිවෙන යනුවෙන් අරුත්දෙනුයේ සිව යන්නට ගෞරව දැක්වීමකි. මනාපදස්සනයයි යනු මනාපදස්සන නම් ලෙණ යනුයි. මෙහි පසුකාලීන සේයාරුවට අනුව පෙර ලිවීමට පසුව හුණු සටහන් තැබීමේදී ප අක්ෂරය ස අක්ෂරය වැනි යමක් ලෙසින් දක්වා ඇත. එය එසේයැයි පැවසුවහොත් එය සවිට හෙවත් සවිත‍්‍ර යනුවෙන් අර්ථ දිය හැකි වුවත් වඩාත් පිළිගතහැකි ආකාරය පවිට යන්න බව විමසීමේදී පෙනෙයි.

සේයාරූ: විකුම් රවිශංඛ

කලූදිය පොකුණේ ලෙන් ලිපි පූර්වබ‍්‍රාහ්මී අක්ෂරවල මුල් කාලයේ ලක්ෂණ පෙන්නුම් කරනු ලබන අතර බොහොමයක් මැකී යමින් සහ දිරාපත් වෙමින් තිබෙනු අත් දුටුවෙමු. එහි පරිසරය ඒ වනවිටත් ටෙලිනාට්‍ය කරුවන් සහ වෙනත් අය විසින් විනාශ කරමින් තිබෙනු පැහැදිලිව පෙනුනු අතර ඇතැම් සාධක මින් පෙර අප සේයාරූ මගින් ඉදිරිපත් කොට ඇත්තෙමු. ශාඛ්‍ය වංශයට ඥාතිවන්නාවූ සීගිරිය අසුර පෙළපතේ මුල් වාසභූමියක් ලෙසින් මෙම පෙදෙස හැඳින්විය හැකිය.
නොමැකී ඉතිරිව තිබූ අප පිටපත් කරගත් කලූදිය පොකුණ අංගසම්පූර්ණ ලෙන් ලිපියක් පහත දැක්වේ.

චිතගුතශ ලෙණෙ ශගශ
(චිත්තගුත්ත තෙරුණ්ගේ ලෙණ සංඝයාටය)

01. ගමික වෙල ඣිත දමය ලෙණෙ ශගශ
(ගම්පති වේලාගේ දියණියවූ ධම්මාගේ ලෙණ සංඝයාටය)
02. පරුමක තිශ පුත පරුමක ශුනකතහ ලෙණෙ ශගශ
(ප‍්‍රමුඛ තිස්සයන්ගේ පුත් ප‍්‍රමුඛ සුනක්ඛතගේ ලෙණ සංඝයාටය)
03. පරුමක දුටික තිශහ ලෙණෙ ශගශ
(ප‍්‍රමුඛ දුටික තිස්සගේ ලෙණ සංඝයාටය )
04. ශුමනගුත තෙරහ ලෙණෙ අගත අනගත චතුදිශ ශගශ
(සුමනගුත්ත තෙරුන්ගේ ලෙණ සිවුදිගින් පැමිණි නොපැමිණි සංඝයාටය)
05. බත තිශහ ලෙණෙ
(ගරුතර තිස්සයන්ගේ ලෙණය)
06. අබහච ඣය රුලයච ලෙණෙ
(අභයගේ සහ බිරිඳ රුලාගේ ලෙණය)